हतार

कविता सुरेन्द्र देवकोटा June 2, 2020, 4:32 am

---

सक्नेभए,

पानीलाई पनि

छोडिदिनु अलिकति तिर्खा

वतासलाई पनि

बाँडिदिनु अलिकति शीतल

ढुंगालाई दिनु अलिकति वजन

धर्तीलाई अलिकति माटो दिनु

संकटमा परेको साथलाई

अलिकति साथ दिनु

अभरमा परेको छ

सेवा गर्ने हात

हातलाई अलिकति हात दिनु ।

विस्तारै आउनु

बाटोले पनि लामो श्वास फेरोस्

र एक छिन आराम गरोस्‌ ।

खाली खाली आएका

यि हातहरूलाई

यो व्रम्हाण्ड नै बोकाएर

हतारलाई पनि हतार हुने गरी

कता हिडिरहेको हो यो लक्कर

पख्नुस्

हजुरबाले बनाएको

चौतारोमा बसेर

एकछिन प्रकृतिको पुराण सुनौं ।

गोरखा

लेखकका अन्य रचना पढ्न यहाँ क्लिक गर्नुहोस ।