14 वर्ष देखी निरन्तर
समकालीन साहित्य

दुर्दिन फेरिएन

कविता काशीनाथ मिश्रित July 8, 2020, 9:11 pm
काशीनाथ मिश्रित
काशीनाथ मिश्रित

(इन्द्रबज्रा छन्द)

बाँचीरहेथ्यो अति कष्ट भोगी

बन्दै हजारौँ दिन दीर्घ रोगी ।

सम्भावना कत्ति हुँदैभएन

आशा मर्यो दुर्दिन फेरिएन ॥

आशा रहुन्जेल न बाँचिने हो ।

आशा हराएपछि के हुने हो

सानो फिलिङ्गोतक देखिएन

आशा मर्यो दुर्दिन फेरिएन ॥

अत्यन्त उत्साहित बन्दथ्यो त्यो

चर्का ति नारा पनि सुन्दथ्यो त्यो ।

टेढो गरेरै पनि हेरिएन

आशा मर्यो दुर्दिन फेरिएन ॥

बन्नेछ नेपाल त स्वर्ग जस्तो

भोग्यौँ सधै नर्क समान यस्तो ।

बाचा हजारौँ गरियो रहेन

आशा मर्यो दुर्दिन फेरिएन ॥

बाँडेर आश्वासन लाख नाना

हुन्थ्यो बडो भाषणमा बयान ।

भोको र नाङ्गो अब क्वै रहेन !

आशा मर्यो दुर्दिन फेरिएन ॥

दुःखी अझै खाडलभित्र पस्ने

सम्भ्रान्तले झन् धनमात्र थप्ने?

पैले भने झैँ किन हेरिएन?

आशा मर्यो दुर्दिन फेरिएन ॥

उस्तै रह्यो हालत साहिँलाको !

घट्दो भयो उन्नति माहिलाको !!

जेठो र कान्छो पनि फेरिएन !!

आशा मर्यो दुर्दिन फेरिएन ॥

फेरिन्न आन्दोलनमा गुमेको

खुट्टो छ उस्तै किन घाइतेको?

चिच्याइराख्दा पनि टेरिएन ।

आशा मर्यो दुर्दिन फेरिएन ॥

रित्तै छ ज्यामीहरुको भँडार !

हेर्दैन कोही पनि फर्किएर ।

निन्याउरा बालक हेरिएन ।

आशा मर्यो दुर्दिन फेरिएन ॥

सम्भावनाको घर संविधान

आयो अरे झोपडिमा पुगेन

तिन्को सुबिस्ता कहिल्यै भएन ।

आशा मर्यो दुर्दिन फेरिएन ॥

राजा हटे त्यो पद रैतिको भो ।

आशा थियो लौ अब क्यै हुने भो ।

राजा हुने चिन्तन फेरिएन ।

आशा मर्यो दुर्दिन फेरिएन ॥

लेखकका अन्य रचना पढ्न यहाँ क्लिक गर्नुहोस ।