14 वर्ष देखी निरन्तर
समकालीन साहित्य

विभ्रम

कविता श्रवणकुमार ढुंगाना August 18, 2020, 9:34 pm
श्रवणकुमार ढुंगाना
श्रवणकुमार ढुंगाना

यो जो ऐना छ

यो कुन ऐना हो

जसमा

म देख्छु जो म होइन

जो म हुँ

त्यसमा म निश्चिन्त छैन।

पिपल छ घरै छेउमा

पिपलको पूजा

तुलसी छ आँगनमा

तुलसीको पूजा

अन्न छन् खेतबारीभरी

अन्नैको पूजा

पूजा सबै ढोंग हो भन्यो कसैले

उसैको पूजा,

म पूजाका अर्चनाहरूमा

आफ्नो अनुहार खोजिरहेछु।

र, पूजिरहेछु

काग, कुकुर, सर्प पनि।

म त अभ्यस्त अभ्यर्थी

ढुंगा पूज्छु

धर्ती पूज्छु

आकाश पूज्छु,

म तिनका अनुग्रहहरूमा

आफ्नो अनुहार खोजिरहेछु।

साहुको पूजा, सामन्तको पूजा

राजाको पूजा, रैतीको पूजा

बाँच्नकालागि !

मार्लान् भन्ने डर लागेकाहरूको पूजा

बचाउलान् भन्ने आश लागेकाहरूको पूजा

म तिनका छायाँहरूमा

आफ्नो अनुहार खोजिरहेछु।

*******

मेरा उन्मादका देवालयहरू

चर्चहरू, मस्जिदहरू, गुम्बाहरूबाट

जब

उठेर मेरा पाइताला

तिरस्कार, घृणा र शासनको बुट लगाएर

प्रेम, सद्भाव र सपनाको चारो छर्दै

स्वर्णिम भविष्यका नाउँमा दौडिए

म मेरै शत्रु बनेर गाउँ, शहर, सीमा हुँदै घरमै रेटिएँ

प्रकृति निसहाय भएर जंगल, खेत र बारी हुँदै गमलामा खुम्चियो,

मेरा नमनमा निहुरिएका शिर पनि

षड्यन्त्र जस्ता

मेरा अभिवादनमा उठेका हात पनि

तरवार जस्ता

म ती विश्वासका लासहरूमा

आफ्नो अनुहार खोजिरहेछु।

म तिम्रा आँखामा

आफूलाई चिन्ने

सामर्थ्य राख्दिन,

यो जो ऐना छ

यो कुन ऐना हो

जसमा

म देख्छु जो म होइन

जो म हुँ

त्यसमा म निश्चिन्त छैन।

लेखकका अन्य रचना पढ्न यहाँ क्लिक गर्नुहोस ।