17 वर्षदेखि निरन्तर
समकालीन साहित्य

जदौ काठमाडौँ

कविता कृष्ण उपाध्याय September 3, 2020, 11:40 am
कृष्ण उपाध्याय
कृष्ण उपाध्याय

न मैले हँसाए न उस्ले हँसायो

र हाँस्ने कुरा चैँ कसैले बगायो

नहाँस्दा नि बाँच्ने बन्यो यो जमाना

परी फुङ्ग आफू रसाएँ कुनामा ।

अशान्तै छ सारा कहाँ हुन्छ अन्त

नहाँस्ने जमाना म यात्री दिगन्त

नदेख्दा कतै नै न हाँसो मिठास

त्यसैलै नहाँसी बसेको उदास ।

यही गाउँ कस्तो जहाँ शून्यता छ

यही ठाउँ कस्तो जहाँ मौनता छ

यही काठमाडौँ झनै पो उदास

नहाँसूँ म यात्री कहाँ ठाउँ खास !

नदी ताल झर्ना नहाँसी बसेका

सफा नीलिमाले नगाँसी सजेका

उडे सामुबाटै चरा दूर कुञ्ज

लिई फर्किने छन् खुसीको निकुञ्ज ।

उदासी थिएँ नै नहाँसी बसेँ नै

खुसी शान्ति मिल्ने छ आशा कसेँ नै

अकस्मात् म यात्री उडेँ अन्य ठाउँ

जदौ काठमाडौँ पुनः हाँस्न आऊँ ।

लेखकका अन्य रचना पढ्न यहाँ क्लिक गर्नुहोस ।