14 वर्ष देखी निरन्तर
समकालीन साहित्य

अब घाम लाग्यो !

कविता काशीनाथ मिश्रित October 13, 2020, 9:09 pm
काशीनाथ मिश्रित
काशीनाथ मिश्रित

(वसन्ततिलका छन्द)

हामी सुत्यौँ विगतमा भइ कुम्भकर्ण

यै हेतु उम्कन गए नि कैयौँ सुवर्ण ॥

तारा डुबे सगरका नवकान्ति छायो !

लौ लौ जुरुक्क उठ है अब घाम लाग्यो !!१॥

खुम्च्याइ हात किन हो र अझै सुतेको ?

थाहा छ;छैन शिरमा उपियाँ घुसेको ??

तन्द्रा टुटेन यसरी कसले सुतायो?

लौ लौ जुरुक्क उठ है अब घाम लाग्यो !!२॥

कालो थियो गगनमा अघिसम्म सारो ।

देखिन्नथ्यो वरिपरी अति भै अँध्यारो ॥

पूर्वी किनार नभको अब खुल्न थाल्यो !

लौ लौ जुरुक्क उठ है अब घाम लाग्यो ॥३॥

घुर्दै अबेरतक सुत्न असाध्य जाती

हुन्थ्यो, सबै उठिसके अब छैन राती !!

क्वीरोसँगै धरतिको सब शीत भाग्यो ।

लौ लौ जुरुक्क उठ है अब घाम लाग्यो!!४॥

बाटा खुले सहज हिँड्न भएन गाह्रो

हाल्दैन कोही पनि बाधक भै तगारो !

लालीसँगै किरणको सब लोक जाग्यो ।

लौ लौ जुरुक्क उठ है अब घाम लाग्यो !!५॥

साकार पार सपना अघि जो बुनेका ।

बाँकी थिए नि मन कुण्ठित भै थुनेका !!

बेला भयो समयले अब ता जगायो ।

लौ लौ जुरुक्क उठ है अब घाम लाग्यो !!६॥

लेखकका अन्य रचना पढ्न यहाँ क्लिक गर्नुहोस ।