14 वर्ष देखी निरन्तर
समकालीन साहित्य

कविता

कविता नारायण मरासिनी October 25, 2020, 3:51 am
नारायण मरासिनी
नारायण मरासिनी

जिन्दगी कविता राम्रो जीवन-गीत गाउँछु

कल्पनामा नभै धेरै विपनामा रमाउँछु

कविता अति नै मीठा दाउरा-घाँसमा हुँदा

शैली र लयमा मर्म चमेली वनमा रुँदा

महङ्गो कोटको हैन चोटको कविता मिठो

निगाह नोटको हैन भोटको कविता मिठो

गोठमा सुरिलो गीत ओठमा हँसिलोपन

बारीमा अनि भारीमा अझै मिठो छ जीवन

झुप्राका कविता लेख्छु महलका म लेख्दिन

विवेकी, रसिला मान्छे महलमा म देख्दिन

युद्ध हो कविता मेरो पलाय नभै कतै

आगो हो कविता मेरो दन्की ज्वाला जताततै

पतेरा, झुसिला किरा पोल्ने मेरो विचार छ

पुँजीको नमिठो गन्ध दौलतमा विकार छ

सङ्गीतमा बजून् शब्द भाव जीवनको बहोस्

बस्तीमा पुग्नु हो राम्रो मस्तीमा कविता नहोस्

पसिनाका छरी बीउ काव्यका फाँटमा पसी

कर्म गर्न सिकाइन्छ मरी-मरी घुँडा धसी

श्रमको गीत हो काव्य सलल बग्नुपर्दछ

चेतनादीप हो काव्य झलल बल्नुपर्दछ

उज्यालो बस्तीमा छर्दै अन्धकार भगाउने

मदोन्मत्त भए साँढे नत्थडोरी लगाउने ।

ज्याग्दीखोला, स्याङ्जा

लेखकका अन्य रचना पढ्न यहाँ क्लिक गर्नुहोस ।