14 वर्ष देखी निरन्तर
समकालीन साहित्य

नयाँ वर्ष आयो !

कविता काशीनाथ मिश्रित April 13, 2021, 8:39 pm
काशीनाथ मिश्रित
काशीनाथ मिश्रित

उही घाम लाग्यो, उही जून लाग्यो !
उही चालले सूर्य उस्तै उदायो !!
सधै झैँ उही मार्गमा घुम्छ पृथ्वी ।
पुरानै धरामा नयाँ वर्ष आयो !!

न सेकेन्ड कैल्यै नयाँ आउँथ्यो त्यो !
मिनेटै नयाँ बन्न पाउन्नथ्यो त्यो !!
न घन्टा बन्यो आजसम्मन् नयाँ यो !
न हप्ता न मैह्ना ! नयाँ वर्ष आयो !!

पुरानै छ छाला, पुरानै छ चाला !
बलोस् दीप ताजा ! पुरानै छ पाला !!
नयाँ तेलले बत्ति कल्ले जलायो ?
उही चेतनामा नयाँ वर्ष आयो !!

उही तालमा थालमा भात उस्तै !
अवस्था उनै, बाध्यता, जात उस्तै !!
न ता काँचुली सर्पले फेर्न पायो !
लतारेर छाती नयाँ वर्ष आयो !!

पुरानै छ ढर्रा नयाँ भो दराज ?
चलेको छ उस्तै गरी कामकाज !!
न दौरा ठुलेले नयाँ फेर्न पायो !
बडो गर्व गर्दै नयाँ वर्ष आयो !!

डढेलो सबै जङ्गली क्षेत्रमा छ ।
निराशा अझै दीनका नेत्रमा छ !!
ठुले भोकले प्यासले छट्पटायो ।
धकेल्दै कठै ! यो नयाँ वर्ष आयो !!

उनै गीत सङ्गीत आलाप गर्दै,
उनै शब्द भण्डार उस्तै सुसेल्दै
उही मल्लकालीन डङ्का बजायो !
कसोरी भनौँ लौ नयाँ वर्ष आयो !!
(भुजङ्गप्रयात छन्द)

लेखकका अन्य रचना पढ्न यहाँ क्लिक गर्नुहोस ।