15 वर्ष देखी निरन्तर
समकालीन साहित्य

प्यारा युवक -२

कविता काशीनाथ मिश्रित November 16, 2021, 4:39 pm
काशीनाथ मिश्रित
काशीनाथ मिश्रित

मेरा प्यारा युवक पथमा लम्क है लम्क लम्क
पर्ला राती तर सगरका जून भैँ चम्क चम्क ।।
डाँका आई धनजन लुटी भैरहेछन् फरार ।
मेरा प्यारा युवक बलिया देशका कर्णधार ।।

टाढाटाढा नजर गर लौ कुन्नि को आउँदैछ ।
केका लागी किन त्यसरि त्यो दृष्टि पो लाउँदैछ ?
आजैदेखी तिमि हुनु प¥यो हेर है होशियार ।
मेरा प्यारा युवक बलिया देशका कर्णधार ।।

हे तन्नेरी उठ न तिमिले साँधमा बाँध किल्ला ।
तिम्रै नाउँ जगतभर भै किर्ति चौपट्ट मिल्ला ।।
केही गर्दा तरुण ! विचमा विघ्न पर्छन् हजार ।
मेरा प्यारा युवक बलिया देशका कर्णधार ।।

कालो जालो सगरभरको वायुले भैm ँउडाऊ ।
आलोपालो गरि युग सधै सारथी भै उठाऊ ।
बैरी देख्दा नहट डरले ताक खुँडा कटार ।
मेरा प्यारा युवक बलिया देशका कर्णधार ।।

तिम्रो रातो रगत नसुकोस् तासको दास बन्दै ।
तिम्रो तातो रगत चिसिए हुन्छ रे काम बन्दै ।
भट्टी भट्टी अब नहिँड है लट्ठिनू हुन्न क्यार ।
मेरा प्यारा युवक बलिया देशका कर्णधार ।।

तिम्रा मुड्की अब हुनु सकून् वज्र जस्तै कठोर ।
एकै घुट्की जल हुन सकोस् अमृतै तुल्यको र !!
लड्दा लड्दै सहिद तिमिले बन्न होऊ तयार ।
मेरा प्यारा युवक बलिया देशका कर्णधार ।।

सिस्नो होऊ अरिकन तिमी पोल तिघ्रा घसारी ।
चुस्ने गर्छन् रगत पसिना खील जस्तै घुसारी ।।
घोक्र्याऊ लौ अब नवयुवा हुन्न यस्तो सहेर ।
मेरा प्यारा युवक बलिया देशका कर्णधार ।।

बत्ती होऊ तिमिर तिमिले तोड छोडी प्रकाश ।
शक्ती आफ्नो प्रबल गर लौ बेश मौका यही छ ।।
हुन्छौ बूढो समय सकिँदै जान्छ क्यारे किशोर ।
मेरा प्यारा युवक बलिया देशका कर्णधार ।।

तिम्रो छाती अब हुन सकोस् व्योम जस्तै फराक ।
तिम्रा आँखा अब हुन सकून् सल्किएका चिराक ।।
देख्दै बैरी थुरथुर भई भैसकून् लम्पसार ।
मेरा प्यारा युवक बलिया देशका कर्णधार ।।

बढ्दै जाऊ प्रगति पथमा लक्ष्य नौलो लिएर ।
चढ्दै जाऊ शिखर तिमिले आँट ठूलो लिएर ।
नेपालीको दिल छुन सधै होऊ है तम्तयार ।
मेरा प्यारा युवक बलिया देशका कर्णधार ।।

लेखकका अन्य रचना पढ्न यहाँ क्लिक गर्नुहोस ।