15 वर्षदेखि निरन्तर
समकालीन साहित्य

प्यारा युवक - ७

कविता काशीनाथ मिश्रित February 7, 2022, 5:21 am
काशीनाथ मिश्रित
काशीनाथ मिश्रित

ढोका ढप्के प्रगतिपथका मार्ग हाम्रा बिलाए ।
भोका नाङ्गा ठगि सदनमा हात तिन्ले मिलाए ।
ताल्चा खोली प्रगतिपथको घ्वार्र दैलो उघार ।
मेरा प्यारा युवक बलिया देशका कर्णधार ।।

मत्ता हात्ती बन न रिपुको सूँडले ढाड भाँच ।
सत्ता खोज्ने अविकसित ती रोगीलाई समात ।
आफ्ना हेरी मुलुक चुसने देशद्रौही झपार ।
मेरा प्यारा युवक बलिया देशका कर्णधार ।।

हाम्रो नीलो गगनतलमा प्वाल ठूलो प¥यो रे ।
लापर्वाही मनुजहरुले गर्न थालेर हो रे ।
यस्तै चाला अझ बढिरहे विश्वमै पर्छ मार ।
मेरा प्यारा युवक बलिया देशका कर्णधार ।।

हाम्रो चारैतिर धमिलियो स्वच्छ वायू रहेन ।
उब्जे ब्याधी दिनदिन नयाँ दीर्घ आयू भएन ।
तिम्रै नौलो पहल जरुरी पर्छ क्यारे किशोर ।
मेरा प्यारा युवक बलिया देशका कर्णधार ।।

आगो सल्क्यो वन वन युवा लाग्न थाल्यो डढेलो ।
सारा जन्तू भयभित भए भस्म नै गर्छ क्या हो ।
आगो लागेपछि अब कुवा खन्न के अर्थ भो र ?
मेरा प्यारा युवक बलिया देशका कर्णधार ।।

हाम्रो निम्ती विजुलि पनि हो धर्तिले नै दिएको ।
खोई कस्ले अझतक छ त्यो स्रोत ठानी लिएको?
यत्रो ठूलो जलनिधि त्यसै मौन भै जान्छ खेर ।
मेरा प्यारा युवक बलिया देशका कर्णधार ।।

थोत्रो गाडी अब बदल भो फ्याँक्छ धूवाँ खराव ।
जस्ले गर्दा असर सबको स्वसप्रस्वासमा छ ।।
खोक्दा कालो कफसहितको निस्कने भोृ खकार ।
मेरा प्यारा युवक बलिया देशका कर्णधार ।।

लेखकका अन्य रचना पढ्न यहाँ क्लिक गर्नुहोस ।