15 वर्षदेखि निरन्तर
समकालीन साहित्य

प्यारा युवक - ११

कविता काशीनाथ मिश्रित May 17, 2022, 4:00 pm
काशीनाथ मिश्रित
काशीनाथ मिश्रित

झोली थाप्नेतिर किन गयो देश हाम्रो? युवा हो !
यस्तै चाला अझ रहिरहे डुब्न पो जान्छ क्या हो !!
स्वाभिमानीपन जुन थियो जान्छ क्यारे गुमेर!
मेरा प्यारा युवक बलिया देशका कर्णधार ॥

पैसा पैसा मगजभरि नै घन्कियो क्यार तिम्रो !
जान्छौ टाढा प्रिय जनविना थन्कियो प्यार तिम्रो !!
कैलेकाहीँ त बुझ न युवा प्रेयसीको पियार !
मेरा प्यारा युवक बलिया देशका कर्णधार ॥

तिम्रा जोडा सृजनशिल ति हातको काम के हो?
बिर्सौला है नवयुवक हो ! देशको नाम के हो?
बारी बेची नउड अब भो फर्क माटो सपार !
मेरा प्यारा युवक बलिया देशका कर्णधार ॥

नेपालीको रगत पसिना खेर जाँदा मलाई
चिन्ता लाग्यो मन छटपटियो गर्छु रोई कराई !
आँसू बग्छन् तरर दिनहुँ पुछ्न को आउला र?
मेरा प्यारा युवक बलिया देशका कर्णधार ॥

तिम्रो इच्छा परतिर हुने ! जे होओस् देशभित्र !
आफ्नी आमा धुरुधुरु रुने ! नित्य हेर्छौ र मित्र?
भन्द्यौ ऐल्यै अब पर म ता जान्नँ कैल्यै भनेर !
मेरा प्यारा युवक बलिया देशका कर्णधार ॥

आत्मा रम्दा बुझ नव युवा ! साग सिस्नो मिठो हो !
आमा रम्दा द्रुत जति चलोस् लिफ्ट, लिस्नो छिटो हो !!
हुर्केका हौ शिशुवय तिमी वक्ष यिन्कै चुसेर !
मेरा प्यारा युवक बलिया देशका कर्णधार ॥

तिम्ले सम्झे नव युवक हो बुद्धको देश हो यो!
तिम्ले बिर्से सुन युवक हो, वृद्धको देश हो यो
बिर्सन्छौ या स्मरण तिमीले गर्दछौ सो विचार !
मेरा प्यारा युवक बलिया देशका कर्णधार ॥

मैले यस्तो अनुनय गरेँ देश छोडी नजाऊ ।
आफ्नै माटो परिश्रम गरी स्वर्ग जस्तो बनाऊ !!
गर्छिन् हाम्री व्यथित जननी मातृभूमि पुकार !!
मेरा प्यारा युवक बलिया देशका कर्णधार ॥

लेखकका अन्य रचना पढ्न यहाँ क्लिक गर्नुहोस ।