बच्चाका ती कुरा

कविता प्रा. डा. मोहन प्रसाद जोशी June 3, 2022, 8:29 pm

---

गणेशस्थानमा दौडेको,
डन्डीबियो खेलेको,
चङ्गा उडाएको,
गुच्चा गुडाएको,
खल्तीमा हालेर
अलिअलि झिक्दै
चना चपाएको,
टिम्बुरले सुहाएको
त्यो रायोको साग खाएको,
अनि लप्सीको अचारसित
दालभात पड्काएको |
सम्झन्छु पूरा
बच्चाका ती कुरा |

माघको महिना,
तकियामा टाउको,
सिरकमा गुटुमुटु,
झ्यालबाहिर देखिने
त्यो सेतो तुसारो,
अनि बल्ल आएको
एघार बजेको घामको
न्यानो लिन मास्तिर
कौसीमा उक्लेको,
र बुबाले ल्याएको
त्यो तरकारी घाममा
आमाले केलाएको,
अनि साग सुकाएको
र गुन्द्रुक बनाएको |
सम्झन्छु पूरा
बच्चाका ती कुरा |

आमाले तयार गरेको
पूजाको सामग्री
बुबाले चढाएको,
पानसमा बालेको
त्यो पाँचसुते बत्ती,
मकलमा हालेको
त्यो धूपको धूवाँ,
दन्केको कपूर,
घन्केको घण्ट,
अक्षता र अबिर,
आसन र अर्घ,
अञ्जलि र अर्चना |
सम्झन्छु पूरा
बच्चाका ती कुरा |

अमेरिका

लेखकका अन्य रचना पढ्न यहाँ क्लिक गर्नुहोस ।