19 वर्षदेखि निरन्तर
समकालीन साहित्य
समकालीन साहित्य
कहिले झर्ना भई छङछङ खस्दै,
कहिले रिसाएजसरी कुर्लेर ओर्लिंदै,
कहिले सुसेला हाली मीठो गीत गाउँदै,
कहिले कम्मर भाँचेर नागबेली खेल्दै,
कहिले सीधासीधा भएर हिँड्दै
एउटा नदी बगिरहेछ |
उसलाई थाहा छैन, ऊ कहाँ जाँदै छ ?
तर जाँदै छ, जाँदै छ, जाँदै छ |
उसलाई थाहा छैन, ऊ के खोज्दै छ ?
तर खोज्दै छ, खोज्दै छ, खोज्दै छ |
एउटा चुम्बकीय आकर्षणमा परेर
ऊ निरन्तर अगाडि बढ्दै छ,
आफैँ नदी भएर पनि
प्यासी भएर हिँड्दै छ |
तर एक दिन आउँदै छ जुन दिन उसको
लामो यात्रा सकिँदै छ,
एक दिन आउँदै छ जुन दिन उसको
सारा प्यास मेटिंदै छ,
एक दिन आउँदै छ जुन दिन ऊ
नदीबाट समुद्र बन्दै छ |