16 वर्षदेखि निरन्तर
समकालीन साहित्य
समकालीन साहित्य
समाजसेवा, व्यापार व्यवसाय, राजनीतिदेखि लिएर धार्मिक गतिविधिमा समेत उत्तिकै सक्रिय देखिएर भूमिका निर्वाह गरेको अनुभव भएका आवरणका मात्र भएपनि सही, सदाचारी पात्र हुन् खलेनाथ शर्मा ।
यिनले व्यापार व्यवसायको क्षेत्रमा जिल्ला उद्योग बाणिज्य संघको महत्वपूर्ण पददेखि सामाजिक सेवाको क्षेत्रमा प्रतिष्ठित अन्तर्राष्ट्रिय पहिचान भएको संस्थाको अध्यक्षको भूमिका पनि निर्वाह गरे । निजी शैक्षिक संस्थामा लगानी गरेर शिक्षाप्रेमी कहलिए ।
उनी र उनका सहोदर भाञ्जा मिलेर पारिवारिक सदस्यहरुको सम्लग्नतामा एउटा सहकारी पनि सञ्चालन गरे । सिधासाधाको मन जित्नका लागि उनले व्यक्तिगत प्रयोजनका लागि गाडी पनि किने । खुद्रा प्रकृतिको व्यापार व्यवसायलाई विस्तार गर्दै डिलरसिपमा सञ्चालन गर्न थाले । बजार क्षेत्र वरपरका केही फालिएका जग्गा जमिन पनि खरिद गरेर राखे । अनेक तरहका काम गरेर खलेनाथले दुनियाँको आँखामा छारो हाल्न सफल भैरहे ।
गाउँबाट शहर झरेर छोटो समयमा आर्थिक छलाङ मार्ने थोरै व्यापारीहरुमा उनको नाम प्रथम दर्जामा आउन थाल्यो । उनी अध्यक्ष भएको र सैयौं आम सर्वसाधारण नागरिक सदस्य रहेको सहकारीमा सर्वसाधारणले करोडौं रुपैयाँ निक्षेप राखे । कतिलाई अरु वित्तीय संस्थाभन्दा धेरै ब्याज दिने भनेर प्रलोभनमा पारियो र निक्षेप रकम सहकारीमा भित्राइयो । खलेनाथले नेतृत्व गरेको ठाउँमा गलत परिणाम आउने कुरामा कसैले पनि शंका गर्ने अवस्था थिएन ।
शहरभरी खलेनाथ शर्माको आर्थिक, सामाजिक तरक्कीका बारेमा चर्चापरिचर्चा हुन थाल्यो । दिन दुई गुणा रात चार गुणाको दरले उनको आर्थिक चमकधमक बृद्धि भएको कुराले सबै आश्चर्य चकित परिरहेका थिए । सफलताको उदाहरण दिनुपर्दा सबैले खलेनाथबाट सिक्नुपर्दछ भन्ने गर्दथे । अभिभावकहरुले आफ्ना छोराछोरीलाई पनि भविश्यमा खलेनाथजस्तै सफल बन्नु भनेर हौस्याउने गर्दथे ।
दिनहरु खलेनाथमय भएर बितिरहेका थिए । अचानक एकदिन, एकाबिहानै खलेनाथ शर्मा सर्वसाधारणको करोडौं रकम कुम्ल्याएर रातारात भाग्यो भन्ने समाचार शहरभरी सनसनीपूर्ण ढंगले प्रवाहित भयो । मानिसहरु मुखामुख गर्न थाले । निक्षेपकर्ताहरु र उसँग आर्थिक कारोवार गरेकाहरु असिनपसिन भए । खलेनाथको व्यापक खोजी भयो । प्रहरी प्रशासन, सेयरधनी, निक्षेपकर्ता र सर्वसाधारणको सामुहिक प्रयासपछि उसलाई पक्राउ गर्ने काम भयो ।
अख्तियारको दुरुपयोग गर्दै सर्वसाधारणको निक्षेप रकम अपचलन गरी ठगी गरेको आरोपमा खलेनाथ शर्मा हिजोआज जेलको चिसो छिंडीमा दिन काटिरहेको छ ।
कुश्मा, पर्वत