दोसाँध

कविता मोहन सुवेदी August 1, 2023, 1:56 pm

---

सिन्दुरी रङ्ले सजिएर
झुल्कियो आजको नौलो घाम
एकाबिहानै मेरो घरको संघारभरि

अँजुलीमा राखें झुल्काहरूलाई
पोखिन्छन् कतै भन्ने डरले
टाँसिदिएँ ह्रदयभरि टमक्क

कसैले मागे म अलिकति दिनसक्छु
मेरो पीर मिस्सिएको घाम
जसले मलाई भित्रबाटै ब्युँझाइरहन्छ

एउटा पाठ पढ्दैछु अचेल
सेतो र कालो रङ्को प्रभेद
घामलाई साक्षी राखेर

कालो रङ्देखि जति नै टाडिनखोज्छु
घामले छेक्नसक्दैन
उत्ति नै नजिक आँउछ ऊ
मुट्ठीभरि बाँधेको सेतो हावालाई
जूनसित खेल्नका लागि
खुल्ला छोडिदिन्छु आँगनभरि

यसबेला मसित न घाम छ
न जून..........

तेजपुर, असम, भारत

लेखकका अन्य रचना पढ्न यहाँ क्लिक गर्नुहोस ।