शरणार्थी झुसिलकिरा

कविता लक्ष्मण थापा December 10, 2025, 6:22 pm

---

तेजाबकुण्डमा खेलिरहेछन्
हाम्रा केटाकोटी
॰
रहरका मट्याङ्ग्रा खेलाएका ‘जेन्जी’ पुस्ता
पत्तै नपाइ
अपहरणमा परेपछि जिल्लाराम परेका छन्
॰
उनीहरु बुझ्दैनन्
धमिलो पानीलाई के धमिल्याउँनु छ र ?
सङ्लो पानीलाई पो धमिल्याउँन सक्छन्, फोहरी हातले
॰
फर्सीका भेट्नातिर
आयातित ‘फंगस’ प्रत्यारोपण गरिएको छ
केटाकोटी त्यही फर्सीका संवाहक बनेका छन्
॰
लाखुले खोलेको केश कर्तनालयमा
जिलेटको पत्ती प्रयोग गरी
नाक कर्तनालय प्रतियोगिता सञ्चालन गरिरहेका छन्
॰
आफ्ना हातहरु
भूमिगत प्युसालाई बुझाएर
आगोसंग खेलिरहेका छन्, वीरका सन्तति
॰
आँगनमा
आततायी बुटले खुनी परेड खेल्दा
घरबेटी घोडा बेचेर सुतिरहेका छन्
॰
शम्सुद्दीनको तरबारको टुप्पाले
पटक पटक कोट्याएको घाउ
बेला बेलामा ओकल्चिइरहन्छ
॰
मझेरीमैं
ऐयारी पाठशाला खोलेर
आत्महन्ता प्रत्यारोपण गरिएको छ
॰
हामी तक्मा झै छातीमा सजाउँन सक्दैनौं
एडस पढाउँने स्कुलहरु
कोरोना र डेङ्गुलाई अँगालो हाल्ने पाठ्यक्रम
॰
प्रायोजित ‘होलीवाइन’ पिएर
ढुनमुनिदै गरेको राष्ट्रियता
अहिले ‘कोमा’मा पुगेको छ
॰
राजधानीको ‘ट्रमा सेन्टर’मा
पीडा समनकर्ता चिकित्सकहरु
नङमा ‘पोटासियम साइनाइड’ लुकाएर पर्खेका छन्
॰
परिणामतः सिस्नाको झ्याङमा
स्वाभिमानको भोटो फालेर
टाईको टुप्पाले आफ्नै मुटु घोचिरहेछन्
॰
अहिले धूमिल पारिएको देशको मुहारमा
देख्दैमा घीनलाग्दा
शरणार्थी झुसिलकिरा सल्बलाइरहेका छन्

लेखकका अन्य रचना पढ्न यहाँ क्लिक गर्नुहोस ।