14 वर्ष देखी निरन्तर
समकालीन साहित्य

लेन्डुपहरु

कविता कृष्ण प्रर्साई February 8, 2009, 12:37 am

देशमा विभिषणहरु ज्यूदैं छन्।

देशमा जालन्धरहरु पनि छन्।

जे जति अर्जुनहरु छन्–

ती अव कुनै हालतमा,

कृष्णको वहकाउमा,

युद्ध लड्न चाहादैनन्।

र पश्चतापको भाषामा–

उल्टै सम्झाइरहेछन् कृष्णलाई,

फेरि अर्को युद्धको तयारी–

अव कसैगरी गर्नु हुन्न भनेर।

अझै जिकिर छ कृपाचार्यको –

उनले चाहेका भए ,

विगतमा पनि –

युद्ध टल्न सकिन्थ्यो भनेर।

निरीह धृतराष्टहरुले –

पहिला पनि कहाँ सिमाना देखेका थिए र!

यसर्थ,

सञ्जयहरु पनि हड्तालमा जुटेका छन् –

उनीहरु अव,

कुनै अन्धाको पाउभक्तिमा,

आफ्नो समय उत्सर्ग गर्र्न चाहादैनन्।

चाहादैनन्–

पुत्र मोहको नाउँमा,

एउटा सिंगै सभ्यता नासियोस्।

दाउको राजनीति छोडेर,

सकुनी पनि सुधि्रएका छन्।

सभ्यता टिकिरहनु पर्छ भनेर–

दुर्योधन सत्संगमा भिजेका छन्।

इच्छा छैन कसैलाई–

अव कुनै युद्ध चम्कियोस–

खरानी बनोस कुरुक्षेत्र।

म चौतारीमा वसेर,

तल हेरिरहेछु –

मेरो देशमा,

हस्तिनापुरमा नभएका–

केही लेन्डुप हरु छन्–

केही लेन्डुप हुन खोज्दैछन्–

भरखर जन्मेका केही लेन्डुपरुलाई,

साना नानीहरु–

पुतला बनाएर जलाउदैछन्।

लेखकका अन्य रचना पढ्न यहाँ क्लिक गर्नुहोस ।