सच्चा देश र भेषको धरहरा हे ! कर्मयागी ऊठ
सेवा भाव र देश खातिर सधैं कल्की उचाली जुट ।
हाम्रो कर्म र धर्ममा सुन फुले सच्चा धरा फुल्दछ
फुल्दा फूल र वासना सँगसँगै मौरी जहाँ डुल्दछ ।।
(२)
नाचौँ छम्छम देशका नजरमा चम्कौं उज्यालो दिंदै
हाँसौ मुस्मुस चेतको बगलमा लम्कौं दियालो लिंदै ।
सिङ्गो भाव र कार्यमा हरघडी चम्की रहोस् मित्रता
रित्तो वाद विवाद यो मगजको फालौँ झिनो तिक्तता ।।
(३)
चम्कौं चम्चम औ बगाइ पसिना माटो बनोस् उर्वर
सङ्लो निर्मल, भावना र सरलता बग्छन् जहाँ निर्झर ।
खम्बा सेवक होस् र जब्बर बनोस् तिम्रो र हाम्रो घर
वास्नादार सुधा कला कुशुमले डाली भकारी भर ।।
(४)
स्रष्टा चेत र भेटको प्रहरमा दैलो उघारौं सखी ।
नौलो बालक देशको बगलमा जन्मेर मासिन्न कि ॽ
सच्चा शासक हौ प्रशासक तिमी, यो राष्ट्रका हार हौ
खुल्दो दीपक हौ बले धपधपी संसारका सार हौ ।।
(छन्दः शार्दुलविक्रीडित)
भीरकोट-४ स्याङ्जा
समकालीन साहित्य